
ගල්අඟුරු ගනුදෙනු විමර්ශනයට ඉඩ සලසමින් බලශක්ති ඇමති කුමාර ජයකොඩි සහ මහාචාර්ය උදයංග හේමපාල ඉල්ලා අස්වෙයි
ගල්අඟුරු ආනයන ක්රියාවලිය සම්බන්ධයෙන් සිදු කිරීමට නියමිත විශේෂ ජනාධිපති කොමිසමේ අපක්ෂපාතී සහ ස්වාධීන විමර්ශනය සඳහා ඉඩ සැලසීමේ අරමුණින් බලශක්ති අමාත්ය කුමාර ජයකොඩි මහතා සිය ධුරයෙන් ඉල්ලා අස්වී ඇත.
එමෙන්ම, එම අමාත්යාංශයේ ලේකම් ලෙස කටයුතු කළ මහාචාර්ය උදයංග හේමපාල මහතාද තම ධුරයෙන් ඉල්ලා අස්වී ඇති බව සඳහන් වේ.
ඔවුන් දෙදෙනාම අද (17) පස්වරුවේ ජනාධිපති අනුර කුමාර දිසානායක මහතා වෙත ලිපි ඉදිරිපත් කරමින් මෙම තීරණය ගෙන තිබේ.
ගල්අඟුරු ආනයනයට අදාළ ක්රියාවලිය පිළිබඳව සම්පූර්ණ පරීක්ෂණයක් පැවැත්වීමට ජනාධිපති කොමිසමක් පත් කර ඇති අතර, එහි විමර්ශන කටයුතු අපක්ෂපාතීව සිදු වීමට අවශ්ය පරිසරයක් සලසා දීම මෙම ඉල්ලා අස්වීම්වල ප්රධාන හේතුව ලෙස සැලකේ.
අද දින ජනාධිපති අනුර කුමාර දිසානායක මහතා විසින් ගල්අඟුරු ආනයනයේදී හා ඒ ආශ්රිත විදුලිය නිෂ්පාදනයේදී අක්රමිකතා සහ නීතිවිරෝධී ක්රියා සිදුවී ඇත්ද යන්න විමර්ශනය කිරීම සඳහා විශේෂ ජනාධිපති පරීක්ෂණ කොමිෂන් සභාවක් පත් කරන ලද අතර බලශක්ති අමාත්යවරයා සහ අමාත්යාංශ ලේකම්වරයා සිය ධුරයන්ගෙන් ඉල්ලා අස්වී ඇත්තේ එම කොමිසමේ අපක්ෂපාතී හා ස්වාධීන ක්රියාවලියට සහාය පළ කිරීමක් ලෙසය.
ජනාධිපතිවරයා වෙත සිය ඉල්ලා අස්වීමේ ලිපිය ඉදිරිපත් කරමින් බලශක්ති අමාත්ය කුමාර ජයකොඩි මහතා සඳහන් කර ඇත්තේ ගල්අඟුරු සැපයුම සම්බන්ධයෙන් විශේෂ ජනාධිපති විමර්ශන කොමිෂන් සභාවක් පත් කිරීමට ගත් තීන්දුවත්, 2009 වසරේ සිට ගල්අඟුරු ආනයනයන් පිළිබඳව විධිමත් පරීක්ෂාවක් කරන ලෙස ජනාධිපති ලේකම්වරයා විසින් අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කිරීමත් මගින් ජනාධිපතිවරයා වෙත ඇති දූෂණයට එරෙහිව සහ ජන වරමට කැපවුණු නිර්භීත අධිෂ්ඨානය අගය කරන බවය.
ඒ අනුව ඉදිරියේදී සිදු කිරීමට නියමිත විමර්ශන කටයුතු ඉතා ස්වාධීනව සහ කිසිදු පක්ෂපාතීත්වයකින් තොරව සිදුවිය යුතු බවට තමන් විශ්වාස කරන බවත් විමර්ශනය සිදුවන අතරතුර තමා එම තනතුරේ රැඳී සිටීම පවා ඊට බාධාවක් වනු ඇත යන ස්ථාවරය මත පිහිටා අද දින සිට ක්රියාත්මක වන පරිදි අමාත්ය ධුරයෙන් ඉල්ලා අස්වන බවත් ඔහු වැඩිදුරටත් සඳහන් කර ඇත.
බලශක්ති අමාත්යාංශයේ ලේකම් මහාචාර්ය උදයංග හේමපාල මහතා තම ලිපිය මගින් පෙන්වා දී ඇත්තේ ඉදිරියේදී ආරම්භ වීමට නියමිත විමර්ශන වලට අවහිරයක් නොවීම සහ විමර්ශන වල ස්වාධීනත්වය තහවුරු කිරීම සඳහා ඊට පහසුකම් සැලසෙන පරිදි තමන් දරන ලේකම් ධුරයෙන් ඉල්ලා අස්වීම යෝග්ය බවට තමන් විශ්වාස කරන බවය.



