
UN අනාවැකියෙන් ගෝලීය ආර්ථික වර්ධනය පහළට
2026 වසර සඳහා ගෝලීය ආර්ථික වර්ධන අපේක්ෂාව එක්සත් ජාතීන්ගේ සංවිධානය විසින් පහළ දමා තිබේ.
එක්සත් ජාතීන්ගේ “World Economic Situation and Prospects” මධ්ය වාර්ෂික යාවත්කාලීන වාර්තාවට අනුව, 2026 වසරේ ගෝලීය දළ දේශීය නිෂ්පාදන වර්ධනය 2.5%ක් ලෙස පුරෝකථනය කර ඇති අතර, 2025 සඳහා ඇස්තමේන්තු කළ 3.0% වර්ධනයට වඩා එය අඩු අගයකි.
ජනවාරි මාසයේ නිකුත් කළ පෙර පුරෝකථනයට සාපේක්ෂවද මෙම අගය ප්රතිශත අංක 0.2කින් පහළ ගොස් ඇතැයි වාර්තාවේ දැක්වේ.
මැදපෙරදිග අර්බුදය හේතුවෙන් උද්ධමන පීඩන යළි ඉහළ යාම සහ ගෝලීය ආර්ථික අවිනිශ්චිතතාව වැඩිවීම මෙම පහළ දැමීමට බලපා ඇති ප්රධාන කරුණු ලෙස එක්සත් ජාතීන්ගේ සංවිධානය පෙන්වා දෙයි.
කෙසේවෙතත්, 2027 වනවිට ගෝලීය ආර්ථිකය 2.8% දක්වා සුළු ප්රකෘතියක් පෙන්නුම් කරනු ඇතැයි ද අපේක්ෂා කර තිබේ.
ශක්තිමත් ශ්රම වෙළෙඳපොළ, ස්ථාවර පාරිභෝගික ඉල්ලුම සහ කෘත්රිම බුද්ධිය මත පදනම් වූ වෙළෙඳ හා ආයෝජන වර්ධනය ආර්ථිකයට සහාය වනු ඇතැයි වාර්තාවේ සඳහන් වෙයි.
ඉන්ධන මිල ඉහළ යාම හේතුවෙන් ශක්ති ක්ෂේත්ර සමාගම්වලට වාසි ලැබී තිබුණද, එය ගෘහස්ථ හා ව්යාපාරික පිරිවැය වැඩි කිරීමට හේතු වී ඇති බවද වාර්තාව පෙන්වා දෙයි.
සංවර්ධිත රටවල උද්ධමනය 2025 වසරේ 2.6% සිට 2026 දී 2.9% දක්වා ඉහළ යනු ඇතැයි පුරෝකථනය කර ඇති අතර, සංවර්ධනය වෙමින් පවතින රටවල එය 4.2% සිට 5.2% දක්වා ඉහළ යා හැකි බව සඳහන් වේ.
පොහොර සැපයුම් බාධා වීම හේතුවෙන් කෘෂිකාර්මික නිෂ්පාදන පිරිවැය ඉහළ ගොස් ඇති අතර, ඒ හේතුවෙන් ආහාර මිල තවදුරටත් ඉහළ යාමේ අවදානමක් පවතින බවද අනතුරු අඟවා ඇත.
බටහිර ආසියාව මෙම තත්ත්වයෙන් වැඩිම බලපෑමට ලක්ව ඇති කලාපය ලෙස සඳහන් වන අතර, එහි ආර්ථික වර්ධනය 3.6% සිට 1.4% දක්වා පහළ යනු ඇතැයි පුරෝකථනය කර තිබේ.
එක්සත් ජනපදයේ ආර්ථිකය ශක්තිමත් ගෘහස්ථ ඉල්ලුම සහ තාක්ෂණික ආයෝජන හේතුවෙන් 2026 දී 2.0%ක වර්ධනයක් සමඟ සාපේක්ෂව ස්ථාවරව පවතිනු ඇතැයි අපේක්ෂා කෙරේ.
යුරෝපා සංගමයේ වර්ධනය 1.5% සිට 1.1% දක්වාත්, බ්රිතාන්යයේ වර්ධනය 1.4% සිට 0.7% දක්වාත් පහළ යනු ඇතැයි වාර්තාවේ දැක්වේ.
චීනයේ ආර්ථික වර්ධනය 5.0% සිට 4.6% දක්වා මන්දගාමී වනු ඇතැයි සඳහන් වන අතර, ඉන්දියාවේ වර්ධනය 7.5% සිට 6.4% දක්වා අඩුවිය හැකි බවද පුරෝකථනය කර ඇත.
අප්රිකානු කලාපයේ සාමාන්ය ආර්ථික වර්ධනයද 4.2% සිට 3.9% දක්වා සුළු වශයෙන් පහළ යනු ඇතැයි එක්සත් ජාතීන්ගේ සංවිධානය වැඩිදුරටත් සඳහන් කරයි.



