ප්‍රධාන පුවත්

බන්ධනාගාර පද්ධතිය ප්‍රතිසංස්කරණය කළ යුතු බව නාමල් රාජපක්ෂ X සටහනකින් කියයි

බන්ධනාගාර පද්ධතියේ ගැටලු සඳහා තාවකාලික විසඳුම් ලබාදීම වෙනුවට සමස්ත පද්ධතියම ප්‍රතිසංස්කරණය කිරීම සඳහා රජය වහා පියවර ගත යුතු බව ශ්‍රී ලංකා පොදුජන පෙරමුණේ ජාතික සංවිධායක සහ පාර්ලිමේන්තු මන්ත්‍රී නාමල් රාජපක්ෂ මහතා පවසයි.

අද (02) සිය “X” ගිණුමේ සටහනක් තබමින් ඔහු මේ බව සඳහන් කර ඇති අතර, බන්ධනාගාර පද්ධතියේ ගැටලු තවදුරටත් තනි සිදුවීම් ලෙස නොසලකා හැරිය නොහැකි බවද අවධාරණය කර ඇත.

එහිදී වැඩිදුරටත් අදහස් දැක්වූ නාමල් රාජපක්ෂ මහතා,

***”තවත් බන්ධනාගාර නොසන්සුන්තාවයක් ඇතිවී තිබේ. මෙවර කොපමණ ජීවිත සංඛ්‍යාවක් අහිමි විය හැකිද යන්න ප්‍රශ්නයකි.මෙය සති කිහිපයක් ඇතුළත බන්ධනාගාරයක් තුළ වාර්තා වූ දෙවන ප්‍රධාන නොසන්සුන්තාවයයි. මේවා තවදුරටත් තනි සිදුවීම් ලෙස බැහැර කළ නොහැක. මෙය අයහපත් කළමනාකරණය, නොසැලකිලිමත්කම සහ දැඩි පීඩනයකට ලක්ව ඇති බන්ධනාගාර පද්ධතියක සෘජු ප්‍රතිඵලයකි. මෙය තවදුරටත් එක් හුදකලා සිදුවීමක් ගැන පමණක් නොවේ. මෙයින් පිළිඹිඹු වන්නේ දුර්වල කළමනාගරණය, නිසි නායකත්වයක් නොමැතිවීම සහ පිරිහීමට ඉඩ හැර ඇති බන්ධනාගාර පද්ධතියක ඛේදවාචකයයි.

අප හමුවේ මෙවැනි අර්බුදයක් දිගහැරෙමින් පවතිද්දී පවා, අදටත් බන්ධනාගාර දෙපාර්තමේන්තුව පවත්වාගෙන යන්නේ ස්ථිර බන්ධනාගාර කොමසාරිස් ජනරාල්වරයෙකු පත් කර නොමැතිවය. මෙතරම් තීරණාත්මක තනතුරක් සඳහා තවමත් සුදුසු අයෙකු නිසි පරිදි පත් කර නොමැත. අමතර ආරක්ෂක බලඇණි යෙදවීමෙන් එක් දිනකට තත්ත්වය පාලනය කරගත හැකි වුවද, එයින් ගැටලුව නිරාකරණය වන්නේ නැත.

බන්ධනාගාරවල පවතින අධික තදබදය, ප්‍රමාණවත් පහසුකම් නොපැවතීම, අසතුටුදායක සෞඛ්‍ය සේවා සහ අර්ථවත් පුනරුත්ථාපන වැඩපිළිවෙළක් නොමැතිකම පිළිබඳව වහා අවධානය යොමු විය යුතුය. සිරදඬුවමකින් පුද්ගලයෙකුගේ නිදහස අහිමි වන නමුත්, ඔහුගේ ගරුත්වය අහිමි නොවේ. ආයතනික වශයෙන් සම්පූර්ණයෙන්ම අසාර්ථක වී ඇති බන්ධනාගාර පද්ධතියකට තාවකාලික පැලැස්තර යෙදීම නතර කර, එම පද්ධතිය ප්‍රතිසංස්කරණය කිරීමට රජය වහා පියවර ගත යුතුය.”***

Related Articles

Leave a Reply

Your email address will not be published. Required fields are marked *

Back to top button