ප්‍රධාන පුවත්

බස් ගාස්තු සංශෝධනය විකෘතියක් – පෞද්ගලික බස් හිමියෝ

බස් ගාස්තු සංශෝධනය සම්බන්ධයෙන් ඉදිරිපත් කර ඇති නව යෝජනාව විකෘති සහ ප්‍රායෝගික නොවන ක්‍රමවේදයක් බව පෞද්ගලික බස් රථ හිමියන්ගේ සංගමය ප්‍රකාශ කරයි.

එහි සභාපති ගැමුණු විජේරත්න මහතා සඳහන් කළේ, බස් ගාස්තු නිසි ලෙස පාලනය කිරීමේ වගකීම රජය හිතාමතාම පැහැර හැර ඇති බවයි.

ඔහුගේ අදහස අනුව, රට පුරා කෙටිදුර සේවා බස් රථ 10,000කට වැඩි ප්‍රමාණයක් සහ දුර සේවා බස් රථ 3,000ක් පමණ ධාවනය වන අතර, මෙම සේවා දෙකට වෙන වෙනම ගාස්තු ක්‍රම දෙකක් හඳුන්වාදීම මගින් ජනතාවට ගැටලු රැසක් මතුවිය හැකි බව පෙන්වා දෙයි.

තවද ඉදිරියේදී ඉන්ධන මිල තවදුරටත් පහළ ගියහොත් කෙටිදුර සේවා සඳහා ප්‍රකාශයට පත් කර ඇති සියයට 12ක ගාස්තු සංශෝධනය කෙසේ ක්‍රියාත්මක කරන්නේද යන්න ගැටලුවක් බවද ඔහු සඳහන් කළේය.

ඒ අනුව ඩීසල් මිල තවදුරටත් අඩු වුවද කෙටිදුර බස් ගාස්තු නැවත පහළ දැමීම ප්‍රායෝගිකව අපහසු වනු ඇති බවද ගැමුණු විජේරත්න මහතා අවධාරණය කළේය.

මේ අතර වාර්ෂික බස් ගාස්තු සංශෝධනය යටතේ දුර සේවා සඳහා සියයට 20ක ගාස්තු වැඩි කිරීමක් සිදු කිරීමට ජාතික ගමනාගමන කොමිෂන් සභාව පියවර ගෙන තිබේ.

මෙම තීරණය හේතුවෙන් ඉදිරි කාලයේදී බස් කර්මාන්තය දැඩි අර්බුදයකට ලක්විය හැකි බවද පෞද්ගලික බස් රථ හිමියන්ගේ සංගමය අනතුරු අඟවයි.

යෝජිත නව බස් ගාස්තු සංශෝධනය අද (05) මධ්‍යම රාත්‍රියේ සිට ක්‍රියාත්මක කිරීමට නියමිතය.

 

Related Articles

Leave a Reply

Your email address will not be published. Required fields are marked *

Back to top button