
අයවැයට විරෝධය පා වෘත්තීය සමිති රැසක් වැඩවර්ජනවලට සැරසෙයි
අයවැයට විරෝධය පළ කරමින් රජයේ වෘත්තීය සමිති රැසක් විවිධ වෘත්තීය ක්රියාමාර්ගවලට අවතීර්ණ වීමට තීරණය කර තිබේ.
2027 වසර සඳහා ඉදිරිපත් කළ අයවැය යෝජනාවලින් සිය ඉල්ලීම්වලට ප්රමාණවත් විසඳුම් ලබාදී නොමැති බව පවසමින් මෙම වෘත්තීය සමිති ක්රියාමාර්ග සංවිධානය කර ඇත.
ඒ අනුව රාජ්ය සේවා ඉංජිනේරු සංගමය පෙරේදා දිනයේදී සංකේත වැඩවර්ජනයක නිරත වූ අතර, හෙට දිනයේ සිට දිවයින පුරා ක්රියාත්මක වන වැඩවර්ජනයකට ද එක්වීමට තීරණය කර තිබේ.
මේ අතර වාරිමාර්ග තාක්ෂණ සහායකවරුන්ගේ සංගමය අද (15) සිට ලබන 17 වැනිදා දක්වා රාජකාරිවලින් ඉවත්ව අසනීප නිවාඩු වාර්තා කිරීමට තීරණය කර ඇත.
2027 අයවැය යෝජනාවලින් වාරිමාර්ග තාක්ෂණ සහායක නිලධාරීන්ට කිසිදු සහනයක් ලබාදී නොමැති බවට චෝදනා කරමින් මෙම ක්රියාමාර්ගය ගෙන තිබේ.
එමෙන්ම හෙට (16) සිට දීප ව්යාප්ත වැඩවර්ජනයක් ආරම්භ කරන බව ආපදා සහන සේවා නිලධාරීන්ගේ වෘත්තීය සමිතිය ද ප්රකාශ කරයි.
එහි සභාපති උපුල් කුමාර මහතා සඳහන් කර ඇත්තේ තම ඉල්ලීම් සඳහා විසඳුම් ලබාදෙන තෙක් අදාළ වැඩවර්ජනය අඛණ්ඩව ක්රියාත්මක කරන බවයි.
තවද අයවැය යෝජනාවලට විරෝධය පළ කරමින් රජයේ පශු වෛද්ය නිලධාරීන්ගේ සංගමය ද අනිද්දා (17) අසනීප නිවාඩු වාර්තා කිරීමට තීරණය කර තිබේ.
එම සංගමයේ සභාපති වෛද්ය උපුල් රංජිත් කුමාර මහතා අද (15) කොළඹ පැවැති මාධ්ය හමුවකට එක්වෙමින් මේ බව අනාවරණය කළේය.
මේ අතර විධායක නිලධාරීන්ට අයවැය මගින් ලබාදී ඇති දීමනා තමන්ට ද හිමිවිය යුතු බව ශ්රී ලංකා රාජ්ය නිලධාරී වෘත්තීය සමිති සම්මේලනය අවධාරණය කරයි.
එහි සභාපති සුමිත් කොඩිකාර මහතා පවසන්නේ සිය ඉල්ලීම් සම්බන්ධයෙන් බලධාරීන්ගෙන් යහපත් ප්රතිචාරයක් නොලැබුණහොත් ඉදිරියේදී දැඩි වෘත්තීය සමිති ක්රියාමාර්ගවලට එළඹෙන බවයි.
මේ අතර මෙවර අයවැය යෝජනාවලින් පෞද්ගලික බස් රථ කර්මාන්තයට කිසිදු සහනයක් හිමිවී නොමැති බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා සඳහන් කර තිබේ.
ඒ අනුව 2027 අයවැය සම්බන්ධයෙන් රාජ්ය අංශයේ වෘත්තීය සමිති කිහිපයක්ම විරෝධතා සහ වැඩවර්ජන ක්රියාමාර්ග සඳහා සූදානම් වෙමින් සිටින බව වාර්තා වේ.



