
මොජ්ටාබා කමේනි ගැන අලුත් සැකයක්
ඉරානයේ නව උත්තරීතර නායක මොජ්ටාබා අලි කමේනි, ඔහුගේ පියා වන අයතුල්ලා අලි කමේනිගේ අවමංගල්ය උත්සවයට සහභාගී නොවීමත් සමඟ ඔහුගේ ආරක්ෂාව සහ සෞඛ්ය තත්ත්වය පිළිබඳ ජාත්යන්තර අවධානය යොමුව තිබේ.
ඉරාන උත්තරීතර නායකයාගේ නියෝජිත අයතුල්ලා හකීම් එලාහි ප්රකාශ කර ඇත්තේ, ඊශ්රායලයෙන් එල්ල විය හැකි ප්රහාර හේතුවෙන් මොජ්ටාබා කමේනි ප්රසිද්ධියේ පෙනී සිටීම ආරක්ෂක අංශ විසින් අවදානම් බව තක්සේරු කර ඇති බවයි.
එහෙත් එම පැහැදිලි කිරීමත් සමඟම විදෙස් මාධ්ය සහ දේශපාලන විශ්ලේෂකයන් අතර විවිධ අනුමාන මතු වී තිබේ. ඒ අනුව, මොජ්ටාබා කමේනි ඊශ්රායල ප්රහාරවලින් ජීවිතක්ෂයට පත්ව ඇත්ද, නැතහොත් බරපතළ තුවාල ලබා රහසිගතව ප්රතිකාර ලබන්නේද යන්න පිළිබඳ සැක මතුව ඇත.
1989 වසරේ සිට දශක තුනකට අධික කාලයක් ඉරානයේ උත්තරීතර නායකයා ලෙස කටයුතු කළ අයතුල්ලා අලි කමේනි, 86 හැවිරිදි වියේදී පෙබරවාරි 28 වැනිදා ඝාතනයට ලක්වූ බව වාර්තා විය.
ඉරාන බලධාරීන්ට අනුව, යුදමය වාතාවරණය හේතුවෙන් මාස හතරකට ආසන්න කාලයක් ඔහුගේ දේහය රහසිගතව තබා තිබූ අතර, පසුව ටෙහෙරානයේ ඉමාම් කමේනි ග්රෑන්ඩ් මොසල්ලා දේවස්ථානයේදී මහජන ගෞරවය සඳහා තැන්පත් කර තිබේ.
ජූලි 4 වැනිදා ආරම්භ වී ජූලි 9 වැනිදා දක්වා පැවැත්වෙන මෙම අවමංගල්ය උත්සවය ඉරානයේ විශාලතම මහජන අවමංගල්යයන්ගෙන් එකක් වනු ඇතැයි අපේක්ෂා කෙරෙන අතර, එය බටහිර රටවලට දේශපාලන පණිවිඩයක් ද රැගෙන යන අවස්ථාවක් ලෙස ද විචාරකයන් හඳුන්වයි.
මෙම අවස්ථාව සඳහා පාකිස්තාන අගමැති ෂෙබාස් ෂරීෆ් සහභාගී වන බව තහවුරු කර ඇති අතර, චීනය සහ ඉන්දියාව ද ඉහළ පෙළේ නියෝජිතයන් යොමු කිරීමට සැලසුම් කර ඇති බව වාර්තා වෙයි.
මේ අතර, මොජ්ටාබා කමේනිගේ නොපෙනී සිටීම පිළිබඳ පැතිර යන අනුමාන හේතුවෙන් ඉදිරි දිනවල ඉරානයේ දේශපාලන තත්ත්වය කෙරෙහි ලෝකයේ අවධානය තවදුරටත් යොමුව තිබේ.



