
ආහාර මිල වැඩි නොකරන බව ආපනශාලා හිමියෝ කියයි
ඉන්ධන මිල ඉහළ ගියද දැනට ආහාර වර්ගවල මිල සංශෝධනයක් සිදු නොකරන බව ආපනශාලා හිමියන්ගේ සංගමය පවසයි. එහි සභාපති හර්ෂණ රුක්ෂාන් මහතා සඳහන් කළේ, ඉන්ධන මිල වැඩිවීම සුළු අගයකින් පමණක් සිදුව ඇති බැවින් එය පාරිභෝගිකයින්ට බරක් වන අයුරින් ආහාර මිලට බලපෑමක් නොකළ යුතු බවයි.
කෙසේවෙතත්, ඉදිරියේදී ගෑස් මිල ඉහළ යාමක් සිදුවුවහොත් ආහාර මිල ගණන් පිළිබඳ යළිත් සමාලෝචනයක් කිරීමට සිදුවනු ඇති බවද ඔහු අවධාරණය කළේය.
“ඉන්ධන මිල වැඩිවුණේ, රුපියල් 12ත්, 15ත් කියන සුළු මුදලකින්. ඒ නිසා අපිට ආහාර පාන මිල වැඩි කිරීමක් සිදු කරන්න බැහැ. ඇත්තටම මේක අපිට පිරිවැයක් කරගන්න බැහැ. ඒ නිසා ආහාර මිල වැඩි කිරීමක් සිදුවෙන්නේ නැහැ. ආහාර මිල වැඩි කරන්න එපා කියලා ආපනශාලා හිමියන්ගෙන් ඉල්ලා සිටිනවා. මෙවැනි අවස්ථාවලදී මහජනතාවට පීඩා වන අයුරින් වැඩි මිලට ආහාර අලෙවි කරන ආපනශාලා වටලා ඔවුන්ට ලබා දෙන්න ඕන දඬුවම් ලබා දෙන්න කියලා අපි පාරිභෝගික සේවා අධිකාරියෙන් ඉල්ලීමක් කරනවා. රුපියල් 12ක් වැනි සුළු මුදලකින් ඉන්ධන මිල වැඩි වුණා කියලා ආහාර මිල වැඩි කරන්න බැහැ.”
තවද, පසුගිය කාලය තුළ ඇතැම් අමුද්රව්යවල මිල පහළ ගොස් ඇති බවද ඔහු පෙන්වා දුන්නේය.
“ගියවතාවේ ආහාර මිල වැඩි කරද්දී බිත්තර මිල රුපියල් 42යි. දැන් බිත්තරයක් රුපියල් 26කට විතර අඩු වෙලා තියෙනවා. කුකුල් මස් කිලෝවක් රුපියල් 1450ක තිබුණේ, දැන් 1250ට 1350ට බැහැලා තියෙනවා. මේ නිසා ආහාර මිල වැඩිවීමකට යන්නේ නැහැ කියලා පාරිභෝගික ජනතාවට කියනවා. හැබැයි ගෑස් මිල යම් කිසි ආකාරයකින් ඉහළ ගියොත්, ඒ පිළිබඳව සාකච්ඡාවක් කරලා කෑම මිල වැඩි කරනවා ද අඩු කරනවා ද කියලා තීරණයක් ගන්න වෙනවා.”
විදුලි බිල ඉහළ යාම හේතුවෙන් පසුගිය මාර්තු 31 සිට ෆ්රයිඩ් රයිස් සහ කොත්තු මිල රුපියල් 30කින් ඉහළ දැමීමට පියවර ගෙන තිබූ අතර, ප්ලේන්ටියක් සහ කිරි තේ එකක මිලද රුපියල් 5කින් වැඩි කර තිබුණි.



