
අයවැය කාලසීමාව තුළ පනත් කෙටුම්පත් තුනක් විවාදයට
අයවැය කාලසීමාව තුළ පනත් කෙටුම්පත් තුනක් විවාදයට ගැනීමට පාර්ලිමේන්තුව තීරණය කර තිබේ.
පාර්ලිමේන්තු මහලේකම් කුෂානි රෝහණදීර මහත්මිය සඳහන් කළේ, ඊයේ (20) කථානායක වෛද්ය ජගත් වික්රමරත්න මහතාගේ ප්රධානත්වයෙන් පැවති පාර්ලිමේන්තු කටයුතු පිළිබඳ කාරක සභා රැස්වීමේදී මෙම තීරණයට එළඹි බවයි.
අයවැය කාලසීමාව තුළ පනත් කෙටුම්පත් විවාදයට අමතරව විශේෂ කාරක සභා තුනකුත්
ඒ අනුව, නොවැම්බර් 23 වැනි සඳුදා පෙරවරු 11.00 සිට පස්වරු 6.00 දක්වා විදේශ කටයුතු, විදේශ රැකියා සහ සංචාරක අමාත්යාංශයේ වැය ශීර්ෂය පිළිබඳ විවාදය පැවැත්වීමට නියමිතය.
එම විවාදයෙන් අනතුරුව පස්වරු 6.00 සිට 6.30 දක්වා විදේශීය ත්රස්තවාදී සටන්කරුවන් වැළැක්වීමේ පනත් කෙටුම්පතේ දෙවැනිවර කියවීමේ විවාදය පැවැත්වීමට තීරණය කර තිබේ.
දෙසැම්බර් 5 වැනි සෙනසුරාදා පෙරවරු 11.00 සිට පස්වරු 6.00 දක්වා තරුණ කටයුතු සහ ක්රීඩා අමාත්යාංශයේ මෙන්ම කාන්තා හා ළමා කටයුතු අමාත්යාංශයේ වැය ශීර්ෂ විවාදයට ගැනීමට නියමිතය.
ඉන් අනතුරුව එදින පස්වරු 6.00 සිට රාත්රී 9.00 දක්වා ශ්රී ලංකා ක්රිකට් පනත් කෙටුම්පතේ දෙවැනිවර කියවීමේ විවාදය පැවැත්වෙනු ඇත.
එසේම, දෙසැම්බර් 7 වැනි සඳුදා පෙරවරු 11.00 සිට පස්වරු 6.00 දක්වා රාජ්ය පරිපාලන, පළාත් සභා සහ පළාත් පාලන අමාත්යාංශයේ හා කම්කරු අමාත්යාංශයේ වැය ශීර්ෂ පිළිබඳ විවාද පැවැත්වීමට සැලසුම් කර ඇත.
එදින පස්වරු 6.00 සිට 6.30 දක්වා ජලභීතිකා රෝගය තුරන් කිරීමේ සහ සුනඛයන් ලියාපදිංචි කිරීමේ පනත් කෙටුම්පතට අදාළ කාරක සභා අවස්ථාව සහ තෙවැනිවර කියවීම සිදුකිරීමට ද තීරණය වී තිබේ.
මෙම දින තුනේදී සභාව කල් තබන අවස්ථාවේ යෝජනා විවාදයට නොගැනීමට ද තීරණය කර ඇත.
මේ අතර, පාර්ලිමේන්තු විශේෂ කාරක සභා තුනක් පිහිටුවීමට අදාළ යෝජනා සඳහා ද පාර්ලිමේන්තු කටයුතු පිළිබඳ කාරක සභාවේ අනුමැතිය හිමිව තිබේ.
ඉන් එක් කාරක සභාවක් පත් කිරීමට යෝජනා වී ඇත්තේ කොවිඩ්-19 වසංගත සමයේ ශ්රී ලංකාවේදී මියගිය පුද්ගලයන්ගේ මෘත දේහ බැහැර කිරීමේදී නිර්දේශිත ප්රමිතීන්, ආරක්ෂිත ක්රියාපටිපාටි, සංස්කෘතික වටිනාකම් සහ ආගමික නිදහස උල්ලංඝනය කළ බවට එල්ල වූ චෝදනා ඇතුළු ඒ සම්බන්ධ කරුණු විමර්ශනය කර පාර්ලිමේන්තුවට වාර්තා කිරීම සඳහාය.
ස්වාධීන තරුණ කොමිෂන් සභාවක් පිහිටුවීම පිළිබඳ කරුණු අධ්යයනය කර නිර්දේශ ඉදිරිපත් කිරීම සඳහා දෙවැනි විශේෂ කාරක සභාව පත් කිරීමට යෝජනා කර ඇත.
තෙවැනි කාරක සභාව මගින් කාවන්තිස්ස ඇතාගේ මරණය, ඊට අදාළ බලධාරීන්ගේ ක්රියාකලාපය සහ වනජීවී ආරක්ෂණ නීති ක්රියාත්මක කිරීම සම්බන්ධයෙන් විමර්ශනය කිරීමට නියමිතය. එවැනි සිදුවීම් යළි ඇතිවීම වැළැක්වීම සඳහා අවශ්ය නිර්දේශ ඉදිරිපත් කිරීම ද එම කාරක සභාවට පැවරීමට යෝජනා වී තිබේ.
මෙම විශේෂ කාරක සභා තුන පිහිටුවීමට අදාළ යෝජනාවලට ද පාර්ලිමේන්තු කටයුතු පිළිබඳ කාරක සභාවේ අනුමැතිය ලැබී ඇති බව වාර්තා වේ.



