කාලගුණය

එල් නිනෝ බලපෑම දරුණු වුවහොත් සාගර ජලය පිරිපහදු කර බෙදාහැරීමටත් සිදුවිය හැකියි

ඉදිරියේදී අපේක්ෂා කෙරෙන එල් නිනෝ (El Niño) දේශගුණික තත්ත්වය පුරෝකථන අනුවම ශ්‍රී ලංකාවට බලපෑම් එල්ල කළහොත්, පානීය ජල අවශ්‍යතා සපුරාලීම සඳහා සාගර ජලය පිරිපහදු කර ජනතාව වෙත බෙදාහැරීමේ අවශ්‍යතාවක් ද ඇතිවිය හැකි බව ආපදා කළමනාකරණ මධ්‍යස්ථානය පවසයි.

අද (10) පැවති මාධ්‍ය හමුවකදී එම මධ්‍යස්ථානයේ අතිරේක ලේකම් කේ.ජී.බී. ධර්මතිලක මහතා සඳහන් කළේ, මෙවර අපේක්ෂා කරන එල් නිනෝ තත්ත්වය පෙර පැවති අවස්ථාවන්ට වඩා දරුණු විය හැකි බවට අනතුරු ඇඟවීම් ලැබී ඇති බවය.

ඔහුගේ අදහස අනුව, එම තත්ත්වය උග්‍ර වුවහොත් රටේ ප්‍රධාන ජල මූලාශ්‍ර පවා සිඳී යාමේ අවදානමක් මතුවිය හැකි අතර, එවැනි තත්ත්වයකට මුහුණදීම සඳහා කල්තියා සැලසුම් සකස් කිරීම අත්‍යවශ්‍ය බව අවධාරණය කර ඇත.

එමෙන්ම හදිසි අවස්ථාවල ජලය බෙදාහැරීම සඳහා භාවිත කරන ජල බවුසර් සංඛ්‍යාව සීමිත බැවින්, දිගුකාලීන නියඟ තත්ත්වයක් ඇති වුවහොත් පවතින සම්පත් ප්‍රමාණවත් නොවිය හැකි බවද ඔහු පෙන්වා දී තිබේ.

ධර්මතිලක මහතා වැඩිදුරටත් සඳහන් කළේ, එල් නිනෝ තත්ත්වය හේතුවෙන් ජල මූලාශ්‍ර වියළී ගියහොත් සාමාන්‍ය ක්‍රමවේදයන් මඟින් ජනතාවට ජලය සැපයීම අපහසු විය හැකි අතර, අවශ්‍ය වුවහොත් සාගර ජලය පිරිපහදු කර බෙදාහැරීම වැනි විකල්ප පිළිබඳවද අවධානය යොමු කිරීමට සිදුවිය හැකි බවය.

මේ අතර, දශකයකට පසු ඇතිවිය හැකි ප්‍රබලම එල් නිනෝ තත්ත්වයක් පිළිබඳව එක්සත් ජාතීන්ගේ කාලගුණ විද්‍යා ඒජන්සියද අනතුරු අඟවා තිබේ.

කාලගුණවිද්‍යා දෙපාර්තමේන්තුව සඳහන් කරන්නේ, එම බලපෑම හේතුවෙන් ජූලි සහ අගෝස්තු මාසවලදී ශ්‍රී ලංකාවේ ඇතැම් ප්‍රදේශවල නියං තත්ත්වයන් වර්ධනය වීමේ හැකියාවක් පවතින බවය.

එල් නිනෝ යනු පැසිෆික් සාගරයේ මතුපිට ජල උෂ්ණත්වය සාමාන්‍ය මට්ටමට වඩා ඉහළ යාම හේතුවෙන් ලොව පුරා කාලගුණික රටාවන් වෙනස් කරන ස්වභාවික සංසිද්ධියකි. එහි බලපෑම හේතුවෙන් ශ්‍රී ලංකාව ඇතුළු දකුණු ආසියානු සහ ඔස්ට්‍රේලියානු කලාපවල වර්ෂාපතනය අඩුවී නියං තත්ත්වයන් උග්‍ර විය හැකි බව විද්‍යාඥයෝ පෙන්වා දෙති.

Related Articles

Leave a Reply

Your email address will not be published. Required fields are marked *

Back to top button