
කොලොන්නාව නිමාවෙන් බවුසර් සඳහා ඉන්ධන නිකුත් නොකිරීමක් – බෙදාහැරීම පිළිබඳ ගැටළු
අද (21) සහ හෙට (22) යන දිනවලදී ඉන්ධන බෙදාහැරීම සිදුකරන බවට ලංකා ඛනිජතෙල් නීතිගත සංස්ථාව විසින් කලින් ප්රකාශ කර තිබුණද, අද දිනයේ කොලොන්නාව නිමාවෙන් බවුසර් සඳහා ඉන්ධන නිකුත් කිරීම සිදු නොවූ බව වාර්තා වේ.
වාර්තාකරුවන් සඳහන් කළේ, පෙර ඇනවුම් කළ ඉන්ධන ලබාගැනීම සඳහා අද උදෑසන කොලොන්නාව නිමාව වෙත පැමිණි බවුසර් රථ රැසක් ඉන්ධන නොලැබීම හේතුවෙන් ආපසු හැරී යන දර්ශන දැකගත හැකි වූ බවයි.
ලංකා ඛනිජතෙල් නීතිගත සංස්ථාවේ කළමනාකාර අධ්යක්ෂ මයුර නෙත්තිකුමාරගේ මහතා ඊයේ (20) ප්රකාශ කර තිබුණේ සෙනසුරාදා සහ ඉරිදා දිනවලද ඉන්ධන බෙදාහැරීම සාමාන්ය ලෙස සිදුකරන බවයි.
කෙසේ වෙතත්, එම ප්රකාශයන්ට පටහැනිව අද දිනයේ කොලොන්නාව නිමාව වෙත පැමිණි බවුසර් රථවලට ඉන්ධන නොලැබීම හේතුවෙන් ඔවුන් ආපසු හැරී යාමත් සමඟ බෙදාහැරීමේ ක්රියාවලිය සම්බන්ධයෙන් ප්රශ්න මතුව ඇත.
මෙම තත්ත්වය පිළිබඳව අදහස් දැක්වූ කළමනාකාර අධ්යක්ෂ මයුර නෙත්තිකුමාරගේ මහතා පවසන්නේ,
“ඊයේ රාත්රිය වෙනකොට ඩීසල් මෙට්රික්ටොන් 10,000කට ආධික ප්රමාණයක් අපි නිකුත් කළා. ඒ වගේම පෙට්රල් මෙට්රික්ටොන් 7,000ක ප්රමාණයක් නිකුත් කළා.”
“සාමාන්යයෙන් අපි දවසකට ඩීසල් නිකුත් කරන්නේ 4,880ක් වගේ ප්රමාණයක්. ඒ් කියන්නේ දෙගුණයක් වගේ නිකුත් කරලා තියෙනවා.”
“ඊයේ (20) දිනයට සහ අද (21) දිනයට යවන්න තිබ්බ ඇනවුම් ඔක්කොම වගේ අපි ඊයේ රාත්රිය වෙද්දි පිටත් කර හැරියා.”
“අද උදෑසන අපි ප්රමුඛතාවය දීලා තියෙන්නේ අත්යවශ්ය සේවා, ඩිපෝ, විදුලි බලාගාර වගේම ගුවන් යානා තෙල් බෙදාහැරීම.”
“ඊට අමතරව අද පස්වරුව වෙද්දී අපි තවත් ස්ථානවල අවශ්යතාවයක් තිබුණොත් එම ස්ථානවලට බෙදන්න බලාපොරොත්තු වෙනවා.”
“අපේ සපුගස්කන්ද, කොලොන්නාව සහ මුතුරාජවෙල කියන ප්රධාන පර්යන්ත 3ම මේ වෙද්දී විවෘත් කරලා තෙල් බෙදාහැරීම කරනවා.”
“නමුත් බෙදුම්කරුවන් අදට දාලා තිබ්බ ඇනවුම් ඔක්කොම වගේ ඊයේ රාත්රිය වෙද්දී ඉවර කරන්න ලෑස්ති කරලා තිබුණේ.”
“බවුසරයක් පුරවලා තියාගන්න අපි තෙල් දෙන්නේ නැහැ. අද පස්වරුව වෙද්දි තත්ත්වය බලලා අද පස්වරුවේ හෝ හෙට උදේ අවශ්ය වුණොත් අවශ්ය ප්රමාණය නිකුත් කරනවා. පසුගිය පෝද දවසෙත් නිකුත් කළා.”
“මැයි මාසයේ මුල් සතිය වෙනකම් අපි සතුව තෙල් සංචිත තිබෙනවා. කිසිම ගැටලුවක් නැහැ.”
ලෙසය .



