ප්‍රධාන පුවත්

කොබෙයිගනේ පොලිසියේ නිලධාරීන් තිදෙනෙකුගේ වැඩ තහනම්

කොබෙයිගනේ පොලිසියේ නිලධාරීන් තිදෙනෙකුගේ වැඩ තහනම් කිරීමට පියවර ගෙන තිබේ. ඒ, පොලිස් භාරයේ සිටියදී රෝහල්ගත කිරීමෙන් අනතුරුව මියගිය සැකකරුවෙකු සම්බන්ධ සිද්ධියට අදාළවය.

කොබෙයිගනේ පොලිසියේ නිලධාරීන් තිදෙනෙකුගේ වැඩ තහනමට හේතුව

මෙලෙස වැඩ තහනමට ලක්කර ඇත්තේ කොබෙයිගනේ පොලිස් ස්ථානයට අනුයුක්තව සේවය කළ පොලිස් සැරයන්වරුන් දෙදෙනෙකු සහ පොලිස් කොස්තාපල්වරයෙකි.

පොලිස් මාධ්‍ය ප්‍රකාශකවරයා සඳහන් කර ඇත්තේ රාජකාරි පැහැර හැරීමේ චෝදනාව මත අදාළ නිලධාරීන්ට එරෙහිව මෙම විනය ක්‍රියාමාර්ගය ගත් බවයි.

පසුගිය ඔක්තෝබර් 25 වැනිදා දහවල් කොබෙයිගනේ, බැද්දේගම ප්‍රදේශයේදී සොරකම් කිහිපයකට සම්බන්ධ බවට සැක කෙරුණු පුද්ගලයෙකු ප්‍රදේශවාසීන් විසින් අල්ලා පොලිසියට භාරදී තිබුණි.

ඉන් අනතුරුව දින දෙකක කාලයක් ඔහු පොලිස් අත්අඩංගුවේ රඳවා සිට ඇති අතර, ඔක්තෝබර් 27 වැනිදා රාත්‍රියේ නිකවැරටිය රෝහලට ඇතුළත් කිරීමෙන් පසු මියගොස් තිබේ.

මෙම මරණය වාර්තා වීමත් සමඟ අදාළ සැකකරු අල්ලා පොලිසියට භාරදුන් ප්‍රදේශවාසීන් පස්දෙනෙකු ද පොලිසිය විසින් අත්අඩංගුවට ගනු ලැබීය.

කෙසේ වෙතත්, අත්අඩංගුවට ගත් පුද්ගලයන්ගේ ඥාතීන් චෝදනා කරන්නේ සැකකරු අල්ලා ගසක බැඳ තැබීමෙන් පැයක් ගතවීමටත් පෙර පොලිසිය දැනුවත් කර ඔහු නිරුපද්‍රිතව භාරදුන් බවයි.

සැකකරුට කිසියම් පහරදීමක් සිදුව තිබුණේ නම් ඔහු මියයාමට පෙර රෝහල්ගත කිරීමට පොලිසිය කටයුතු කළ යුතුව තිබූ බව ද ඔවුහු පෙන්වා දෙති.

මේ අතර, අත්අඩංගුවට ගත් ප්‍රදේශවාසීන් පස්දෙනා මෙතෙක් මුදාහැර නොමැති අතර, ඔවුන් අධිකරණයට ඉදිරිපත් කිරීමට නියමිත බව පොලිස් මාධ්‍ය කොට්ඨාසය වැඩිදුරටත් සඳහන් කර ඇත.

Related Articles

Leave a Reply

Your email address will not be published. Required fields are marked *

Back to top button