
නුවන් තුෂාර vs ශ්රී ලංකා ක්රිකට්: IPL 2026 සඳහා NOC ඉල්ලීමට SLC විරුද්ධය
ශ්රී ලංකා ක්රිකට් ක්රීඩකයින්ගේ වෘත්තීය නිදහස සහ ජාතික වගකීම් අතර සීමාව කෙසේ තීරණය විය යුතුද යන්න පිළිබඳව නුවන් තුෂාරගේ මෙම නඩුව තවත් වරක් සමාජයේ අවධානය යොමු කරයි. ක්රීඩකයන්ට ජාත්යන්තර ලීග් අවස්ථා ලබාගැනීම වැදගත් වුවද, ආයතනික ප්රමිතීන් හා යෝග්යතා මිනුම් පිළිපැදීමද සමානවම අත්යවශ්ය වේ.
2026 වසරේ පැවැත්වීමට නියමිත ඉන්දීය ප්රිමියර් ලීග් (IPL) ඇතුළු ජාත්යන්තර ලීග් තරගවලට සහභාගි වීමට අවශ්ය “විරෝධතා නොමැති බව” (NOC) සහතිකය නිකුත් කරදෙන ලෙස ඉල්ලා ක්රිකට් ක්රීඩක නුවන් තුෂාර විසින් ගොනු කළ නඩුවට ශ්රී ලංකා ක්රිකට් (SLC) ආයතනය විරෝධතා ඉදිරිපත් කිරීමට තීරණය කර ඇත.
මෙම නඩුව අද (09) කොළඹ දිසා අධිකරණයේදී කැඳවූ අවස්ථාවේදී දෙපාර්ශවයේ නීතිඥවරුන් විසින් කරුණු ඉදිරිපත් කළ අතර, SLC පාර්ශවය විසින් විරෝධතා ගොනු කිරීමට කාලය ඉල්ලා සිටියේය. ඒ අනුව, නඩුව අප්රේල් 23 දිනට යළි කැඳවීමට අධිකරණය නියම කළේය.
මෙම නඩුවේ වග උත්තරකරුවන් ලෙස ශ්රී ලංකා ක්රිකට් සභාපති ෂම්මි සිල්වා, ලේකම් බන්දුල දිසානායක, භාණ්ඩාගාරික සුජීව ගොඩලියැද්ද සහ ප්රධාන විධායක නිලධාරී ඈෂ්ලි ද සිල්වා නම් කර ඇත.
පැමිණිලිකරු වන නුවන් තුෂාර පෙන්වා දෙන්නේ, තමන් ශ්රී ලංකා ජාතික කණ්ඩායම නියෝජනය කරන ක්රීඩකයෙකු වන අතර, SLC සමඟ ඇති ගිවිසුම 2026 මාර්තු 31 දින අවසන් වූ බවයි.
ඔහු පවසන්නේ, 2024 සහ 2025 වසරවලදීත් ජාත්යන්තර ලීග් තරග සඳහා සහභාගි වීමට SLC විසින් NOC ලබා දී ඇති බවත්, එවැනි සහතිකයක් නොමැතිව එවැනි තරගවලට එක්විය නොහැකි බවත්ය.
කෙසේ වෙතත්, 2026 සඳහා එම NOC සහතිකය ඉල්ලූ අවස්ථාවේදී SLC විසින් එය ප්රතික්ෂේප කර ඇති බව ඔහු චෝදනා කරයි.
SLC පාර්ශවය පෙන්වා දෙන්නේ, ක්රීඩකයා ආයතනය විසින් නියමිත ශාරීරික යෝග්යතා පරීක්ෂණය සාර්ථකව සමත් නොවීම හේතුවෙන් මෙම තීරණය ගෙන ඇති බවයි.
නමුත්, එම චෝදනාව ප්රතික්ෂේප කරන නුවන් තුෂාර පෙන්වා දෙන්නේ, තමන්ගේ ගිවිසුම ද අවසන් වී ඇති බැවින්, NOC ලබාදීමට SLCට නීතිමය බාධාවක් නොමැති බවයි.
ඒ අනුව, 2026 IPL ඇතුළු ජාත්යන්තර ලීග් තරගවලට සහභාගි වීම සඳහා අවශ්ය NOC සහතිකය නිකුත් කිරීමට ශ්රී ලංකා ක්රිකට් ආයතනයට අනිවාර්ය අතුරු නියෝගයක් නිකුත් කරන ලෙස අධිකරණයෙන් ඉල්ලා තිබේ.



