
මුරුංගා ඇටවලින් ජලයේ මයික්රොප්ලාස්ටික් 98.5%ක් ඉවත් කළ හැකි බව පර්යේෂණයකින් හෙළිවේ
“ආශ්චර්යමත් ගස” ලෙස බොහෝ දෙනා හඳුන්වන මුරුංගා ගස සම්බන්ධයෙන් නව විද්යාත්මක සොයාගැනීමක් වාර්තා වී තිබේ. බ්රසීලය සහ බ්රිතාන්යය නියෝජනය කරන විද්යාඥයින් පිරිසක් සිදු කළ පර්යේෂණයකින් හෙළි වී ඇත්තේ, මුරුංගා ඇටවලට පානීය ජලයේ අඩංගු PVC මයික්රොප්ලාස්ටික් අංශු 98.5%ක් දක්වා ඉවත් කිරීමේ හැකියාව පවතින බවයි.
මෑතකදී ප්රකාශයට පත් කළ පර්යේෂණ වාර්තාවට අනුව, ජල පිරිපහදු ක්රියාවලියේදී බහුලව භාවිතා කරන රසායනික ද්රව්යවලට සමාන කාර්යක්ෂමතාවයක් මුරුංගා ඇටවලින් ලබාගත හැකි බව තහවුරු වී ඇත.
විද්යාඥයින් පැහැදිලි කරන්නේ මුරුංගා ඇට “කැටිකාරකයක්” ලෙස ක්රියා කරන බවයි. එමඟින් ජලයේ පවතින ඉතා කුඩා මයික්රොප්ලාස්ටික් අංශු එකිනෙකට බැඳී විශාල වීම නිසා, ඒවා පහසුවෙන් පෙරා ඉවත් කළ හැකි තත්ත්වයට පත් වේ.
මෙම පර්යේෂණයේදී විශේෂ අවධානය යොමු කර ඇත්තේ ජලයේ බහුලව හමුවන හානිකර PVC මයික්රොප්ලාස්ටික් ඉවත් කිරීම පිළිබඳවයි. මිනිස් කෙස් ගසක ඝනකමෙන් හතරෙන් එකක් පමණ වන අතිශය කුඩා අංශු පවා ඉවත් කිරීමට මෙම ක්රමය සමත් වී ඇති බව සඳහන් වේ.
සාම්ප්රදායිකව භාවිතා වන ඇලුමිනියම් සල්ෆේට් වැනි රසායනික ද්රව්යවලට සාපේක්ෂව, මුරුංගා ඇට ස්වභාවිකව දිරාපත් වන අතර පරිසරයට විෂ සහිත බලපෑම් ඇති නොකරන බව විද්යාඥයින් පෙන්වා දෙයි. අධික ඇලුමිනියම් ශරීරගත වීම ස්නායු ආබාධ සමඟ සම්බන්ධ විය හැකි බවද ඔවුන් සඳහන් කරයි.
පර්යේෂකයන්ට අනුව, එක් මුරුංගා ඇටයකින් ජලය ලීටර් 10ක් පමණ පිරිපහදු කළ හැකිය. එහෙත් විශාල නගරවල ජල පද්ධති සඳහා විශාල ඇට ප්රමාණයක් අවශ්ය වන බැවින්, මෙම ක්රමය කුඩා ප්රජාවන්ට හෝ රසායනික ද්රව්ය ලබාගැනීමට අපහසු ප්රදේශවලට වඩාත් ප්රයෝජනවත් විය හැකි බව සඳහන් වේ.
2024 අධ්යයනයකට අනුව, ලොව පුරා නළ ජලයෙන් 83%ක පමණ මයික්රොප්ලාස්ටික් අඩංගු බව හෙළි වී ඇති අතර, එවැනි පසුබිමක මුරුංගා ඇට මත පදනම් වූ ස්වභාවික ජල පිරිපහදු ක්රමයක් සොයා ගැනීම සෞඛ්ය සහ පරිසර ක්ෂේත්රයට වැදගත් ඉදිරි පියවරක් ලෙස සැලකේ.
අනාගත පර්යේෂණ මඟින් අනෙකුත් ප්ලාස්ටික් වර්ග සහ ඉතා කුඩා නැනෝප්ලාස්ටික් අංශු ඉවත් කිරීමේ හැකියාවද තවදුරටත් අධ්යයනය කිරීමට නියමිතය.



