
අක්වාන් සුළි කුණාටුව හේතුවෙන් ධීවර හා නාවික ප්රජාවට රතු නිවේදනයක්
අක්වාන් සුළි කුණාටුව හේතුවෙන් මුහුදු ප්රදේශවල ඇතිවිය හැකි තද සුළං සහ රළු මුහුදු තත්ත්වය සැලකිල්ලට ගනිමින් ධීවර හා නාවික ප්රජාව වෙත රතු අනතුරු ඇඟවීමේ නිවේදනයක් නිකුත් කිරීමට කාලගුණ විද්යා දෙපාර්තමේන්තුව පියවර ගෙන තිබේ.
අක්වාන් සුළි කුණාටුව හමුවේ මුහුදු ප්රදේශ කිහිපයක ධීවර හා නාවික කටයුතුවලින් වළකින ලෙස දැනුම් දෙයි
ශ්රී ලංකාවට ගිනිකොනදිග බෙංගාල බොක්ක සහ ඊට ආසන්න නිරිතදිග බෙංගාල බොක්ක මුහුදු ප්රදේශයේ පැවති ගැඹුරු පීඩන අවපාතය මේ වන විට සුළි කුණාටුවක් බවට පත්වීම මෙම අනතුරු ඇඟවීමට හේතු වී ඇත.
‘අක්වාන්’ ලෙස නම් කර ඇති මෙම සුළි කුණාටුව ඊයේ (16) පස්වරු 5.30 වන විට උතුරු අක්ෂාංශ 12.2° සහ නැගෙනහිර දේශාංශ 85.7° ආසන්නයේ කේන්ද්රගතව පැවති බව කාලගුණ විද්යා දෙපාර්තමේන්තුව සඳහන් කරයි.
එම පද්ධතිය තවදුරටත් උතුරු-වයඹ දිශාවට ගමන් කරමින් අද (17) පස්වරු 5.30 පමණ වන විට බටහිර මධ්යම බෙංගාල බොක්ක මුහුදු ප්රදේශයේදී ප්රබල සුළි කුණාටුවක් දක්වා වර්ධනය වීමේ ඉහළ හැකියාවක් පවතින බවට අනාවැකි පළ කර තිබේ.
එමෙන්ම ඉදිරියේදී වයඹ දිශාවට ගමන් කරන මෙම පද්ධතිය නොවැම්බර් 19 වැනිදා පෙරවරු 5.30 පමණ වන විට ඉතා ප්රබල සුළි කුණාටුවක් බවට පත්විය හැකි බවද පුරෝකථනය කර ඇත.
අනතුරුව නොවැම්බර් 20 වැනිදා පෙරවරු 11.30 පමණ වන විට ඉතා දරුණු සුළි කුණාටුවක් ලෙස ඉන්දියාවේ ආන්ද්රා ප්රදේශ් සහ යනාම් වෙරළ තීරයේ තෙල්ලෝර් සහ ටුනි අතර ප්රදේශයෙන් ගොඩබිමට ඇතුළු වීමට ඉඩ ඇති බව කාලගුණ අනාවැකිවල දැක්වේ.
අක්වාන් සුළි කුණාටුව හේතුවෙන් මුහුදු ගමන්වලට දැඩි අවදානමක්
මෙම තත්ත්වය හේතුවෙන් උතුරු අක්ෂාංශ 05°ත් 17°ත් අතර සහ නැගෙනහිර දේශාංශ 80°ත් 90°ත් අතර මුහුදු ප්රදේශවල ධීවර හා නාවික කටයුතුවල නිරත වීමෙන් නැවත දැනුම් දෙන තුරු වැළකී සිටින ලෙස දැනුම් දී තිබේ.
එසේම කන්කසන්තුරය සිට ත්රිකුණාමලය සහ මඩකලපුව හරහා පොතුවිල් දක්වා වෙරළට ඔබ්බෙන් පිහිටි මුහුදු ප්රදේශවලද ධීවර හා නාවික කටයුතුවලින් ඉවත්ව සිටින ලෙස උපදෙස් ලබාදී ඇත.
දැනටමත් අදාළ මුහුදු ප්රදේශවල ධීවර හා නාවික කටයුතුවල නිරතව සිටින පිරිස් වහාම ආරක්ෂිත ස්ථාන වෙත යාත්රා කරන ලෙසද බලධාරීන් දැනුම් දෙයි.
තවද කාලගුණ විද්යා දෙපාර්තමේන්තුව විසින් ඉදිරියේදී නිකුත් කරනු ලබන කාලගුණ අනාවැකි සහ අනතුරු ඇඟවීම් පිළිබඳව නිරන්තර අවධානයෙන් පසුවන ලෙස ධීවර හා නාවික ප්රජාවගෙන් ඉල්ලා සිටියි.
අද දිනයේ ප්රදේශ කිහිපයකට වැසි
මේ අතර අද (17) දිනයේ බස්නාහිර, සබරගමුව සහ වයඹ පළාත්වලට මෙන්ම මහනුවර, නුවරඑළිය, ගාල්ල සහ මාතර දිස්ත්රික්කවලටද වැසි වාර කිහිපයක් ඇතිවිය හැකි බව කාලගුණ විද්යා දෙපාර්තමේන්තුව පවසයි.
ඌව පළාතේ මෙන්ම අම්පාර සහ හම්බන්තොට දිස්ත්රික්කවලද පස්වරු 2.00න් පසුව ස්ථාන කිහිපයක වැසි හෝ ගිගුරුම් සහිත වැසි ඇතිවීමේ හැකියාව පවතී.
දිවයිනේ අනෙකුත් ප්රදේශවල ප්රධාන වශයෙන් වියළි කාලගුණයක් පැවතිය හැකි අතර බොහෝ ප්රදේශවල අලුයම් කාලයේදී මීදුම් සහිත තත්ත්වයක්ද අපේක්ෂා කරන බව වැඩිදුරටත් සඳහන් වේ.



